Pandharpur: विठ्ठल भक्तांसाठी आनंदाची बातमी,पंढरपूरच्या विठुमाऊलीचे पदस्पर्श दर्शन येत्या 2 जूनपासून सुरु होणार
सत्यविचार न्यूज :
विठ्ठल- रुक्मिणी मातेच्या भक्तांसाठी एक (Pandharpur)आनंदाची बातमी आहे. गेल्या अडीच महिन्यांपासून बंद असलेले विठ्ठल- रुक्मिणीचे पदस्पर्श दर्शन पुन्हा सुरू करण्यात येणार आहे. दोन जूनपासून विठ्ठल रुक्मिणीचे पदस्पर्श दर्शन सुरू होणार असल्याची माहिती विठ्ठल- रुक्मिणी मंदिर समितीने दिली आहे.
महाराष्ट्राचे आराध्य दैवत विठ्ठल रुक्मिणी माता मंदिरात संवर्धन आणि सुशुभिकरणाचे (Pandharpur)काम सुरू असल्याने 15 मार्चपासून पदस्पर्श दर्शन बंद होते. आता आषाढी वारी येत असल्याने मंदिरातील पदस्पर्श दर्शन पुन्हा सुरू करण्याचा निर्णय मंदिर प्रशासनाने घेतला आहे.
मंदिर समितीचे सहअध्यक्ष गहिनीनाथ महाराज यांच्या अध्यक्षतेखाली आज मंदिर समिती सदस्यांची बैठक झाली. यावेळी हा महत्वपूर्ण निर्णय घेण्यात आला आहे. विठ्ठल आणि रुक्मिणीदेवी यांच्या गाभाऱ्यातील काम पूर्ण झाले असून येत्या दोन जूनपासून पदस्पर्श दर्शन सुरू करण्यात येणार आहे.
15 मार्चपासून विठ्ठल रुक्मिणी देवीचे पदस्पर्श दर्शन बंद ठेवण्यात आले होते. मंदिराचे जवळपास 70 टक्के काम पूर्ण झाले आहे. उर्वरित 30 टक्के कामासाठी अवधी लागणार आहे. मात्र आता आषाढी वारीनिमित्त मंदिरातील पदस्पर्श दर्शन पुन्हा सुरू करण्यात येत आहे. तसेच आषाढी यात्रेच्या निमित्ताने 7 जुलै पासून देवाचे 24 तास दर्शन सुरू राहणार आहे.
