पोदार इंटरनॅशनल स्कूल चाकण येथे गुरुपौर्णिमेचा सण उत्साहात साजारा.
“गुरुब्रह्म गुरुविष्णुः गुरुर्देवो महेश्वरः, गुरुसाक्षात परंब्रह्म तस्मै श्रीगुरवे नमः।।”
प्रत्येक मनुष्याच्या जीवनात गुरूला अनन्यसाधारण महत्व आहे. विद्यार्थ्यांमध्ये संस्कारांची जपणूक करण्यासाठी तसेच, विद्यार्थ्यांना गुरूंचे महत्व पटवून देण्यासाठी पोदार इंटरनॅशनल स्कूल चाकणच्यावतीने सोमवार दिनांक २२/०७/२०२४ रोजी शाळेच्या प्रांगणात गुरुपौर्णिमेचा कार्यक्रम अतिशय उत्साहात साजरा करण्यात आला.
या कार्यक्रमाची सुरुवात व्यासांच्या प्रतिमेला वंदन करून करण्यात आली. कार्यक्रमामध्ये इयत्ता पहिली ते दहावीच्या विद्यार्थ्यांनी पुढाकार घेतला. कार्यक्रमाच्या सुरुवातीला इयत्ता दहावीच्या विद्यार्थ्यांनी शाळेच्या मुख्याध्यापिका सिमरन मॅम आणि उपमुख्याध्यापिका गोमती मॅम तसेच, शाळेचे इतर व्यवस्थापक शिक्षक, शिक्षिका आणि इतर शिक्षकवृंदांचे पारंपारिक पद्धतीने औक्षण करून स्वागत केले. विद्यार्थ्यांद्वारे नृत्य, गायन, नाटक तसेच भाषणे असे विविध कार्यक्रमांचे आयोजन करण्यात आले. विद्यार्थ्यांद्वारे शिक्षकांकरिता विविध खेळांचे देखील आयोजन करण्यात आले.
या प्रसंगी गुरुपौर्णिमेचे पौराणिक महत्व सांगताना शाळेच्या मुख्याध्यापिका सिमरन मॅम म्हणाल्या की, धकाधकीच्या आयुष्यात गुरूंची गरज का भासते याचा विचार केला असता, त्याचे महत्त्व अधिक स्पष्ट होते. आजच्या वेगवान आणि स्पर्धात्मक जीवनशैलीत आपल्याला ज्ञान, अनुभव आणि मार्गदर्शनाची गरज अधिक तीव्रतेने भासते. हे मार्गदर्शन आपल्याला गुरूंच्या रूपात मिळते. गुरू म्हणजे फक्त शाळा किंवा महाविद्यालयातील शिक्षक नव्हे, तर ते आपले जीवनविषयक मार्गदर्शक असतात. शिक्षकांच्या आणि पालकांनी केलेल्या संस्कारांमुळे माणूस घडतो. विद्यार्थ्याच्या विकासात पालकांचा जेवढा वाटा असतो तितकाच शिक्षकांचा देखील असतो. म्हणूनच शालेय जीवनात गुरुपौर्णीमेला अनन्य साधारण महत्व आहे.
त्याचप्रमाणे, विद्यार्थ्यांना गुरुपौर्णिमेचे महत्व पटवून देताना शाळेच्या उपमुख्याध्यापिका गोमती मॅम म्हणाल्या की, मातृऋण, पितृऋण व गुरूचे ऋण कधीच फिटत नाही. व्यक्तीच्या जन्मानंतर त्याचा पहिला गुरू असतो आई, मग आयुष्याला मार्ग दाखवणारा आपला मार्गदर्शक गुरू. खरं तर जी व्यक्ती आपल्याला नवी वाट दर्शवते, जीवनाला गंध देणारं नव ज्ञान देते, आपली चूक नकळत सुधारते, ती व्यक्ती जीवनात आपल्या गुरूच्या स्थानी जाते. गुरुपौर्णिमा हा ज्ञानाच्या स्त्रोताबद्दल कृतज्ञता व्यक्त करण्याचा दिवस आहे जो तुम्हाला अस्तित्वाच्या संकटांमध्ये संतुलित ठेवतो आणि तुम्हाला आत्मविश्वासाने आणि दूरदृष्टीने चालण्याची परवानगी देतो.
अशाप्रकारे, मोठयांचे मार्गदर्शन, भाषणे, नृत्य, गायन इत्यादी विविध रंगारंग कार्यक्रमांद्वारे तसेच, आधुनिक तंत्रज्ञानाच्या युगातही गुरूंचे महत्त्व कमी झालेले नाही. असा संदेश देत गुरुपौर्णिमेचा कार्यक्रम अतिशय उत्साहात साजरा झाला.
![](https://satyavichar.in/wp-content/uploads/2024/07/1000599715-1024x496.jpg)