चाकणला महिलेच्या गर्भपिशवी मधील
काढली सहा किलो वजनाची गाठ,.
तीन तासाच्या प्रयत्नांना आले यश,
चाकण : प्रतिनिधी
चाकण येथे एका सत्तेचाळीस वर्षीय महिलेच्या गर्भपिशवी मधील सहा किलो वजनाची गाठ काढून महिलेला जीवदान देण्यात आले आहे. अत्यंत गुंतागुंतीची व अवघड शस्त्रक्रिया करून महिलेच्या गर्भपिशवीतील गाठ काढण्यात डॉक्टरांना तब्बल तीन तासाच्या अथक प्रयत्नानंतर यश आले. चाकण येथील आंबेठाण चौकात असलेल्या नाईक हॉस्पिटलमध्ये ४७ वर्षीय एका महिलेच्या गर्भपिशवी मधील सहा किलो वजनाची गाठ काढण्यात आली. प्रसिद्ध स्त्रीरोग तज्ञ डॉ.बी. एस. नाईक व डॉ.कविता नाईक यांनी या महिलेवर अत्यंत गुंतागुंत असलेली शस्त्रक्रिया करून वीस हप्ते गर्भपिशवीत असलेली सहा किलो वजनाची गाठ काढली. मृत्यूच्या दाढेत अडकलेल्या सबंधित महिलेचे प्राण वाचल्याने त्यांच्या कुटुंबीयांनी डॉ. नाईक दापत्याचे कौतुक केले. त्यानंतर
या महिलेस दोन रक्ताच्या बाटल्या भरण्यात आल्या. यापूर्वी डॉ.नाईक यांनी एका महिलेच्या पोटातून आठ किलो वजनाचा गोळा काढून तिचेही प्राण वाचवले. त्याबद्दल त्यांचा चाकण मधील विविध सेवाभावी संस्था व संघटनांच्या वतीने गौरव करण्यात आला.
डॉ. कविता नाईक यांनी सांगितले की,” संबंधित रुग्ण महिलेला दवाखान्यात आणले, त्यावेळी त्यांना अस्वस्थ वाटत होते. सातत्याने होणारा रक्तस्त्राव, पाळीच्या वेळी दुखणे आणि पोटदुखी यासारखी लक्षणे दिसत होती. मासिक रक्तस्त्रात होणारी वाढ, ओटी पोटात दुखणे आणि पोटावर दाब येणे असा त्यांना त्रास होत होता. तपासणी केल्यानंतर असे आढळून आले की, त्यांच्या गर्भपिशवीमध्ये गाठ आहे. ती काढणे अत्यंत गरजेचे आहे. संबंधित महिलेवर अत्यंत गुंतागुंतीची व अवघड शस्त्रक्रिया करून सहा किलो वजनाची गाठ काढली. या महिलेचा जीव धोक्यात असतानाही डॉ.भूषण नाईक यांनी घेतलेला निर्णय महिलेला जीवदान देण्याचा ठरला.”
” महिला रुग्णाचा वैद्यकीय इतिहास आणि गाठीचा आकार यामुळे शस्त्रक्रियेतील आव्हान वाढले होते. सुरक्षित आणि परिणामकारक शस्त्रक्रिया करणे हा पर्याय निवडला. शस्त्र क्रियेच्या वेळी गंभीर समस्या निर्माण होतात, धोकाही असतो. मात्र देव तारी त्याला कोण मारी, याचा प्रत्यय या महिलेचे प्राण वाचण्यातून आला. महिलांनी कोणताही आजार अंगावर सहन न करता डॉक्टरांचा सल्ला घ्यावा.”- बी.एस.नाईक, स्त्रीरोग तज्ञ, चाकण.,
![](https://satyavichar.in/wp-content/uploads/2024/07/WhatsApp-Image-2024-07-25-at-3.43.29-PM-1.jpeg)