टाकळकरवाडी शाळेच्या शमिम शेख यांचा मुख्य कार्यकारी अधिकारी यांच्या हस्ते सन्मान !
सत्यविचार न्यूज :
खेड तालुक्यातील नावाजलेल्या पी एम श्री जिल्हा परिषद प्राथमिक आदर्श केंद्रशाळा टाकळकरवाडीच्या उत्तम शिष्यवृत्ती मार्गदर्शिका , उपक्रमशील आदर्श शिक्षिका शमिम उस्मान इनामदार – शेख यांच्या पाचवीच्या वर्गातील 14 विद्यार्थी शिष्यवृत्ती गुणवत्ताधारक ठरले असून 2 विद्यार्थी नवोदय विद्यालय प्रवेश पात्र तर 1 विद्यार्थी सैनिक स्कूल प्रवेशासाठी पात्र ठरला आहे. पुणे जिल्हा परिषदेचे मुख्य कार्यकारी अधिकारी संतोष पाटील , अतिरिक्त मुख्य कार्यकारी अधिकारी चंद्रकांत वाघमारे , शिक्षणाधिकारी (प्राथमिक) संजय नाईकडे यांच्या हस्ते पुणे येथे विशेष सत्कार सोहळ्यात शमिम शेख यांना उत्तम शिष्यवृत्ती मार्गदर्शक शिक्षिका पुरस्काराने सन्मानित करण्यात आले.
सौ. शमिम शेख मॅडम यांनी आपल्या अथक प्रयत्नातून हे अभूतपूर्व यश मिळविल्याबद्दल किवळे ग्रामस्थांच्या वतीनेही त्यांचा सन्मान करण्यात आला. शिष्यवृत्तीच्या पाचवीच्या वर्गाला अध्यापन करत असताना संपूर्ण वर्षभरात एकही दिवस सुट्टी न घेता सकाळी 9 ते संध्याकाळी 6 वाजेपर्यंत नियमितपणे अध्यापन केल्यामुळे हे यश मिळाल्याचे शेख मॅडम यांनी सांगितले. यापूर्वीही विविध उपक्रमांच्या माध्यमातून विद्यार्थी गुणवत्तेसाठी अधिकचे प्रयत्न करत असताना मंथन , एन.एस.एस., आय ॲम विनर यासारख्या विविध परीक्षांमधूनही त्यांचे विद्यार्थी जिल्हा व राज्य पातळीपर्यंत यशस्वी झालेले आहेत.
यावर्षी पाचवीच्या एकूण 36 विद्यार्थ्यांपैकी 33 विद्यार्थी या परीक्षेसाठी पात्र ठरले असून एकूण निकाल 92 % लागल्याबद्दल शिक्षण क्षेत्रातील अनेक मान्यवरांकडून त्यांचे अभिनंदन करण्यात येत असून पंचक्रोशीतून त्यांच्यावर शुभेच्छांचा वर्षाव होत आहे.
इनामदार मॅडम यांचे माहेर पाबळ,तर सासर किवळे. सासर आणि माहेर या दोन्ही ठिकाणचे नाव उंचावल्या बद्दल नातेवाईक, तेथील ग्रामस्थ व मित्र – मैत्रिणी यांच्या कडून शुभेच्छा दिल्या जात आहेत. शेख मॅडम यांनी जिद्द , चिकाटी , तळमळीने घेतलेल्या अविरत व प्रामाणिक कष्टाबद्दल त्यांच्या सर्व महिला पालक , ग्रामस्थानी शाल श्रीफळ व बुके देऊन त्यांचा विशेष सन्मान केला.
![](https://satyavichar.in/wp-content/uploads/2024/07/1000557550-1024x682.jpg)